Berbadam Şiiri - Sevinc Arzulu

Istəsəm ürəkdən güləmmirəm ki,
Sevdanın dərdini biləmmirəm ki,
Çoxdandır özümə gələmmirəm ki,
Neynəyim,mən indi halı bərbadam.
Yarası qanamış,xalı bərbadam.

Varlığa dönəcək bir zaman heçim,
Dostumu tanıyım,düşməni seçim.
Coşub-daşan Kürü mən necə keçim,
Gəmisi dağılmış,salı bərbadam.
Bəyazı qaralmış,alı bərbadam.

Dedim ki,bəxtimi oxu,qaraçı.
O şirin sözlərdən toxu,qaraçı.
Deyəsən bəd gəlir çoxu,qaraçı.
Heç zaman düz çıxmaz falı,bərbadam.
Dəymişi yarımçıq,kalı bərbadam.