Ben baxa bilmirim Şiiri - Sevinc Arzulu

Tarix deyən yenə başa dönübdür,
Dünən Can dediyim daşa dönübdür.
Kədərim, möhnətim yaşa dönübdür,
Mən baxa bilmirəm şəhid şəklinə.

Ah, oğul itirmək çox ağır, Allah,
Ruhunu yanına sən çağır, Allah.
Üzündən-gözündən nur yağır, Allah,
Mən baxa bilmirəm şəhid şəklinə.

Ordumuz daha bir qələbə çaldı,
Sədası dünyanı qoynuna aldı.
Analar-atalar oğulsuz qaldı,
Mən baxa bilmirəm şəhid şəklinə.

Neçə şəhid verdik bu otuz ildə,
Eh, rəhmət oxumaq asandır dildə.
Şəhid anasının göz yaşın sil də,
Mən baxa bilmirəm şəhid şəklinə.

Ürəyim necə də uçalanır, bax
Düşmənin bəd dili haçalanır, bax.
Məzarı üstünə su calanır, bax
Mən baxa bilmirəm şəhid şəklinə.

Daha cavanlara qıyma,İlahi,
Bağrımın başını oyma, İlahi.
Qanı yerdə qalmaz. Qoyma İlahi,
Mən baxa bilmirəm şəhid şəklinə.