Bele dünyanı Şiiri - Sevinc Arzulu

Nişanı, toyu da bir yarış imiş,
Harayı, hoyu da bir barış imiş.
Sən demə boyu da bir qarış imiş,
Bəs niyə böyütdük belə dünyanı.

Istəsə könlümdə tufan qopartsın,
Istəsə kədəri, qəmni çoxaltsın.
Yamanı özüylə yuyub aparsın,
Eh, necə verərdim selə dünyanı.

Tanrım, özün qoru sadiq bəndəni,
Tək sənsən munisi, sənsən həmdəmi.
Elə əzizdir ki saçımın dəni,
Dəyişməm ağarmış telə dünyanı.

Bitməyir qovğası, ədavəti heç,
Qalmayıb azacıq ədaləti heç.
Görünmür gözümə əzəməti heç,
Verərəm aparsın yelə dünyanı.

Istəsən bir ovuc darıya çevir,
Üz-gözü qırışmış qarıya çevir.
Istər kəpənəyə, arıya çevir,
Özün nə bilirsən elə dünyanı.