Baxışa döndü Şiiri - Sevinc Arzulu

Sən sevgimin təcəssümü,
Ömrümdə naxışa döndün.
Məni görcək təbəssümün,
Kədərli baxışa döndü.

Şeş gətirmədi çaharım,
Nuş olmadı heç naharım.
Güllü-çiçəkli baharım,
Sərt küləkli qışa döndü.

Külək telini darayı,
Boş qoymaz ki daş sarayı.
Adamların hay-harayı,
Xoş dilək alqışa döndü.

Soyuyubmu köz daşları,
Tökülübmü söz qaşları
Sevdalımın göz yaşları,
Bir leysan yağışa döndü.

Əlvan libaslar geyirdik,
Daşdan yumuşaq yeyirdik.
Bayquşa namərd deyirdik,
Mərd ürəkli quşa döndü.