Başına dolandığım Şiiri - Sevinc Arzulu

Könlümü didən xatirə,
Pərişan edən xatirə.
Qəlbimdə dündən xatirə,
Var, başına dolandığım.

Zülmət çökdü qaramıza,
Qəm yaraşır haramıza.
Nədən girdi aramıza,
Xar , başına dolandığım.

Nə saralıb, nə solasan,
Hiss tək könlümə dolasan.
Istərdim mənə olasan,
Yar, başına dolandığım.

Qəlbimi üzən qəm olma,
Göy səmada sis-çən olma.
Ah-naləmə tək sən olma
Kar, başına dolandığım.

Ürəyimdən uzaq riya,
Gözlərimə yaddır röya.
Mənə olar sənsiz dünya
Dar, başına dolandığım.