Baş tacım Şiiri - Sevinc Arzulu

Günəşlə bir oyanıb,
Addımladım küçəni.
Xatirənə boyanıb,
Andım olub-keçəni.

Elə bil ki səmadan,
Işıq gəldi gözümə.
Doymadım gül simadan,
Yığışmıram özümə.

Ayrılığın zərrəsi,
Sanki mənə dəyibdir.
Həsrətin daş zərbəsi,
Budağımı əyibdir.

Baş əymişəm taleyin
Pozulmaz qanununa.
Vardır azcıq gileyim,
Daha nə deyim ona.

Qoy kor olsun hicranın,
Yaşamaq olsun acı.
Mənəm şadı dünyanın,
Məhəbbətin baş tacım.
12.09.2018