Bahardan sonra Şiiri - Sevinc Arzulu

Gözlərim axtarır yenə o qızı,
Yolunun üstündə duran yalqızı.
Nə yayı görmədim, nə də payızı,
Gəldi ömrün qışı bahardan sonra.

Əlimdə solmayan çiçək dəstəsi,
Dilimdə vüsalın gözəl bəstəsi.
Sanırdım yandırar günəş istisi,
Yağdı qar yağışı bahardan sonra.

Dəymə, meyvələrin dərmə kalını,
Eh, kimə deyərsən ərzi-halını.
Çəmənə sərdiyim güllü xalının,
Pozuldu naxışı bahardan sonra.

Daha qayıtmaz ki ölümə gedən.
əzizi yoxdustsa ruhsuzdur bədən.
Elə bil havası çatmadı birdən,
Soldu gül baxışı bahardan sonra.

Bir dəfə xəyala heç dalmadın ki,
Yolunu qəlbimdən sən salmadın ki.
Gözəl gəncliyimə əl çalmadın ki,
Neynirəm alqışı bahardan sonra.