Ayrılığın doğum günü Şiiri - Sevinc Arzulu

Dünən ayrılığın doğum günüydü,
Kaş qara gələydi bayramı onun.
Dünən vüsalımım ölüm günüydü,
Bir daha düşmədi axşamı onun.

Bir daha düşmədi axşamı onun,
Çünki səhəri də açılmadı, bax.
Daha heç yanmaz ki ağ şamı onun,
Taledən, qismətdən qaçılmadı, bax.

Dünən ayrılığın doğum günüydü,
Qara daş doğaydı anası onu.
Deyən əzrailin yoğun günüydü,
O anda boğaydı anası onu.

Boğaydə əliylə qəm mücəmməsin,
Özgəyə kədəri qatılmayaydı.
Bu qədər can almaq deyilmi bəsi,
Həsrətə, hicrana satılmayaydı.

Sanki uzun illər görüşməmişdi,
Hicranı dəli tək həsrətə cumdu.
Bunca ədalətsiz görünməmişdi,
Vüsalın gözünü əbədi yumdu.