Atlar Şiiri - Sevinc Arzulu

Heyrət.Tablo qurulmuş,
Görən ona vurulmuş.
Dodaqları qurumuş,
Çaydan su içər atlar.

Yeməz, ot acı olsa,
Qaçar, əlacı olsa.
Əldə qılıncı olsa,
Düşməni biçər atlar.

Qorxmaz qardan-yağışdan,
Çıxar boranlı qışdan.
Namərdi ilk baxışdan,
Tanıyıb seçər atlar.

Qışın oğlan çağında,
Boza çalan ağından.
Qar-boranlı dağından,
Astaca keçər atlar...

Doymaram ki sehrindən,
Tez saldığı mehrindən.
Sahibinin qəhrindən,
Dünyadan köçər atlar.