Arzu bacım Şiiri - Sevinc Arzulu

Sandıq ki fələk laldı,
Yolunu bizdən saldı.
Şeirlər yetim qaldı,
Artdı əzabım, acım.

Qəmi götür aradan,
Seç bəyazı qaradan,
Belə yazdı Yaradan,
Tənha qaldı baş tacın.

Ölüm yağdı, sis oldu,
Torpaq yandı, his oldu.
Nədən halın pis oldu,
Tapılmadı əlacın.

Nə küsdür, nə xətrə dəy,
Dost önündə başın əy.
Yazmazsan şerimə rəy,
Sənə var ehtiyacım.

Tez tapıldı oyadan,
Doymadın bal röyadan.
Nə tez köçdün dünyadan,
Ay mənim Arzu bacım.