Ağrılı ümidler Şiiri - Sevinc Arzulu

Götürə bilərsənmi,
Vüsalın çəkdiyini.
Hicranın biçdiyini,
Həsrətin əkdiyini.

Eh, ağrılı ümidlər.
Ölüb, sabaha qalıb.
Qara-qara buludlar,
Batıb günaha, qalıb.

Yığıb saxladıqları,
Həsəddir, nifrət-kindir.
Sezib baxmadıqları,
Eşq yurduna sakindir.

Sanki bəyaz gecələr,
Layla çalır ömrümə.
Eh, neyçünlər,necələr
Kölgə salır ömrümə.

Sanki aydın səmada
Qəfildən şimşək çaxıb.
Quşlar donub havada,
Ulduzlar birdən axıb.

Yer üzü qürrələnib.
Ulduz yağışı üçün.
Ürəyim zərrələnib,
Sevda baxışı üçün.

Gedərəm lap sonuna,
Bu sevda nağılının.
Girərəm qəm donuna,
Yeyib kədər noğlunu.
01.10.2018