Âgâz-ı Gazeliyyât 258 Şiiri - Agah

Çeşm-i mestün ne siyehkâr idügin ben bilürem
Çekmişem derdini bîmâr idügin ben bilürem
Birbirinden sebak-ı cevr olurlar ta‘lîm
Hûblar cümle cefâkâr idügin ben bilürem
Bende çok sâgar u peymâne şikest eylemişem
Mest-i nahvet ne dil âzâr idügin ben bilürem
Cevr-i sayyâd nedür murg-ı giriftâr anlar
O cefâ-cû ne sitemkâr idügin ben bilürem
Gerçi şebnem gibi her gül-ruha üftâde geçer
Kime Âgâh giriftâr idügin ben bilürem