Âgâz-ı Gazeliyyât 238 Şiiri - Agah

Gönül o gül-ruh ile teng bir kabâda degül
Nesîm gibi anunçün karâr-dâde degül
Sadâ çıkar mı şikest-i habâbdan ey şûh
Hazer ki şîşe-i dildür bu câm bâde degül
‘Aceb mi şu‘le-i âhum olursa digergûn
Ki dil egerçi o dildür o dilrübâda degül
Ne sûd çeşm-i Züleyhâya hüsn-i Yûsufdan
Ki şimdi dîde-i Ya‘kûbveş güşâde degül
Felek senün ne kumâş oldugun bilür Âgâh
Bir iki dirheme erzendesin ziyâde degül