Ağ qağayılar Şiiri - Sevinc Arzulu

Qızılgül oluban açmaq istəyir,
Ürəyim quş olub uçmaq istəyir.
Könül təbiəti qucmaq istəyir,
Başımın üstündə ağ qağayılar.

Göz yaşı heç tökmək istəmirəm mən,
Önündə diz çökmək istəmirəm mən.
Bezmişəm,dərd çəkmək istəmirəm mən,
Məndən uzaq dursun qara qayğılar.

Günəş yer üzünə fərəhlə baxır,
Səmadan torpağa zər nurlar axır.
Nədən göydə birdən ildırım çaxır,
Görən fələk indi kimi qarğıyar.