Acı xatireler Şiiri - Sevinc Arzulu

Dostum, bu nə səsdi, kiri,
Kövrəltməyə bəsdi biri.
Bəzən dadlı, bəzən şirin,
Bəzən acı xatirələr.

Yaş gəldikcə yaşım üstə,
Dən də qonur qaşım üstə.
Dolanırsız başım üstə,
Könül tacı xatirələr.

Tez söndürər oda düşcək,
Yatırdar qan-qada düşcək.
Gülümsərəm yada düşcək,
Qəm əlacı xatirələr.

Əl uzatsa aya yetər,
Dəniz görər, çaya yetər.
Çətinimdə haya yetər,
Qardaş, bacı xatirələr.

Nurlandırar xülyasını,
Sevər günəş şüasını.
Əskik etməz duasını,
Dindar, Hacı xatirələr.