57 yaşımız var Şiiri - Sevinc Arzulu

Görən nə deyir insanlar,
Verməzlər xeyir insanlar.
Axı bir deyil insanlar,
Adamlıqda naşımız var.

Həsrət yalqız ölməyəcək,
Hicran onsuz gülməyəcək.
Kimsə silə bilməyəcək,
Gözümüzdə yaşımız var.

Həyat bizə biçər min don,
Geyinərik ya beş, ya on.
Brillyantdır, ya silikon.
Üzüklərdə qaşımız var.

Tanrım, göydən bərat gətir,
Sehirli al xalat gətir,
Billur qabda salat gətir,
Buludda ağ aşımız var.

Solub gedən bir gülük ki,
Gün saraldan ağ tülük ki...
Biz səninlə həmilik ki,
Əlli yeddi yaşımız var.
12.02.2019